Милошоски: Државата доби претседател избран со кредит и политичка хипотека

0
215

Пратеничката група на ВМРО ДПМНЕ му посака успешен мандат на новиот претседател Стево Пендаровски, но пратеникот Антонио Милошоски изјави дека државата доби претседател избран со кредит и политичка хипотека.

– Доби политички кредит од политичари и партии кои ќе очекуваат тој кредит да им се врати. Враќањето на тој кредит нема да биде од страна на Пендаровски, туку од политичарот со кого тој се согласува 102,5 отсто, според неговите зборови, рече Милошоски.

Според пратеникот на опозициската партија, во иднина ќе гледаме кои фактури ќе стигнат на сметка на Владата и на државата.

– Таквото враќање на политичкиот кредит најмногу ќе ги разочара тие кои со доверба и големи очекувања гласале за Пендаровски, додаде тој.

Од денес, истакна тој, СДСМ и ДУИ ја имаат апсолутната власт во државата.

– Имаат Собрание и мнозинство и министри, мнозинство на градоначалници и претседател на држава. Апсолутната власт носи апсолутна одговорност, но понекогаш апсолутната власт е многу корумпира, рече пратеникот на ВМРО- ДПМНЕ.

Милошоски вели дека е многу чудно и невообичаен сигнал што на инаугурацијата на Пендаровски не присуствува премиерот Зоран Заев.
– Ќе видиме следниве ден – два што ќе се случува и дали следните денови ќе дадат објаснување за неговото отсуство, рече Милошоски.