Светската ракометна федерација го објави системот на натпреварување за претстојниот Супер Глоуб турнир, односно неофицијалното светско клупско првенство, на кое за првпат во историјата ќе учествуваат десет екипи. Вардар и Барселона се директно пласирани во четвртфиналето, додека Кил, Сиднеј, Ал Мухдар и Њујорк, ќе играат осминафинале.
Покрај Вардар и Барселона, екипи кои ќе чекаат четвртфинален противник се уште и Замалек, Таубате, Ал Духаил и Ал Вехда. Осминафиналните средби ќе бидат на програмата на 27 август, додека четвртфиналињата ќе се играат на 28. Полуфиналните натпревари ќе бидат на 29 август, а 30 е слободен ден.
Мечот за титулата ќе се одигра на 31 август. Наградниот фонд е 400.000 долари за прво место, 250.000 за второ и 125.000 за трето место. Вардар по втор пат ќе игра на Супер Глоуб, а претходниот пат беше поразен во полуфиналето од Барселона.
