Лидерот на Движењето Самоопределување (ВВ) Албин Курти, кој се очекува да биде иден премиер на Косово откако неговата партија победи на парламентарните избори, ја одби денеска најновата понуда од лидерот на Демократскиот сојуз на Косово (ЛДК) Иса Мустафа за формирање заедничка влада, јави дописникот на МИА од Приштина. ЛДК вчера ја објави последната понуда до ВВ, со барање да ја преземе функцијата претседател на Собранието на Косово до изборот на претседател на Државата, што треба да се случи во април 2021 година, откако ќе му истече мандатот на актуелниот претседател Хашим Тачи. Според барањето на ЛДК, кое денеска со писмо до партискиот лидер Мустафа го одби неговиот колега од ВВ Курти, ВВ треба да го повлече од функцијата собраниски спикер Глаук Коњуфца, кој беше именуван на таа позиција на конститутивната седница на Собранието на 27 декември, и на таа функција да се именува член од ЛДК. Кога ќе се избере претседателот на Републиката на предлог на ЛДК, собранискиот спикер повторно ќе биде вратен на ВВ, е условот што го постави партијата на Мустафа.
