Заради ограничување на пандемијата на коронавирус, САД посегнаа по драстични мерки и го суспендираа влезот на патници од Европа на 30 дена.
Американскиот претседател Доналд Трамп во телевизиско обраќање најави дека границите за луѓето од Европа ќе бидат затворени од петок на полноќ. Тој ги обвини државите од ЕУ за недоволно брзо реагирање против раширувањето на новиот вирус. Според Трамп, посебно критика заслужува тоа што по избувнувањето на вирусот во Кина, европските граници не беа затворени за патниците од Кина, мерка што ја презедоа САД. Раководителот на Здравствената служба на САД, ЦДЦ, Роберт Редфилд, изјави дека Европа во кризата со коронавирусот претставува „вистинска закана“ за САД. Сепак, во забраната не е вклучена Велика Британија, а Трамп не го објасни исклучокот. Вирусот во меѓувреме се рашири и во Велика Британија, досега таму се потврдени преку 450 инфекции. Затворањето на границите за патници важи за 26 држави од Шенгенскиот простор, во кој Велика Британија не припаѓа.
