Две кривични пријави за техничкиот премиер Оливер Спасовски најави министерот за внатрешни работи Наќе Чулев. Двете се однесуваат на периодот кога тој беше на чело на МВР. Едната е заради злоупотреба на службена положба за фалсификување службен документ за одлука на Владата објавена во службен весник, а другата за несовесно работење при распоредување лица во МВР.
– Се работи за две кривични пријави. Првата кривична пријава е злоупотреба на службена должност од страна на техничкиот премиер Оливер Спасовски како претседател на Влада, со поддршка на одредени владини служби за фалсификување на службен документ. Се работи за седницата на Влада на која во официјалниот дел, за што постојат стенограми и записи, беа поништени пет решенија, меѓутоа веднаш потоа во „Службен весник“ излезе одлука на Влада која беше фалсификувана дека се поништени 142 решенија. При тоа е направена злоупотреба на службена должност како претседател на Влада со фалсификување на службен документ, рече министерот Чулев, одговарајќи на новинарско прашање при посетата на полициската станица во Автокоманда, Гази Баба.
Втората кривична пријава, појасни, се однесува на несовесно работење со наштетување на Буџетот заради распоредување на три лица припадници на МВР за кои, како што рече, е прекршен Законот за Агенција за национална безбедност.
