Над 71 илјада евра, пари кои биле наменети за наградниот фонд на наградната игра „Мој ДДВ, МојаНаграда“ ќе бидат уплатени во Фондот за помош и поддршка за справување со кризата предизвикана од коронавирусот КОВИД-19. Ова е одлука која Владата ја донесе на вчерашната седница. Нема детали кои награди ќе се доделуваат, а кои ќе се намалат со оглед на тоа што беа предвидени 12 месечни извлекувања на кои 15 добитници добиваат по 100.000 денари, додека имаше предвидено и две главни награди кои вредат по три милиони денари. Едната главна награда е веќе извлечена, требаше да има уште една до крајот на годината. Инаку и месечните извлекувања требаше да бидат до крај на годината.
Според новата одлука на Акционерското друштво за приредување игри на среќа „Државна лотарија на Република Северна Македонија“ ќе му с епрепорача средствата во износ од 4.383.410 денари да ги уплати на донаторската сметка отворена во рамки на Генерален секретаријат на Владата наменета за донации од правни и физички лица за справување со КОВИД-19 епидемијата.
Во наградната игра учествуваат сите кои скенираат фискални сметки. Во еден наврат министерката за финансии Нина Ангеловска рече дека не е планирано да се укине повратот на ДДВ и порача граѓаните да продолжат да скенираат сметки. Наградната игра беше одвоен дел од оваа акција.
