Русковска потврди дека се води истрага за Дончев, Ивановска најави постапка за непријавување на приходи

„Да, се води истрага“, потврди денеска шефицата на Обвинителството за организиран криминал и гонење на корупција Вилма Русковска, одговарајќи на новинарско прашање откако неделникот Фокус објави дека Управата за финансиско разузнавање, по барање на Обвинителството за организиран криминал, утврдила дека Дончев во 2018 година добил 3 милиони денари или околу 50.000 евра од македонската компанија регистрирана за интернет-портали со седиште во Муртино „Ремаркет“, чии приливи пак доаѓале исклучиво од австралиската „Мегантик“.

Претходно, од обвинителството ни соопштија дека по доставена кривична пријава против Дончев и уште две лица е оформен предмет по кој активно се постапува во насока на проверка на наводите во пријавата. Во таа насока, велат од обвинителството, надлежен јавен обвинител кој постапува во предметот изминатиот период има издадено низа наредби, а воедно во насока на расветлување на наводите се сослушани и лица. Меѓутоа, од таму не споделија повеќе детали во интерес на, како што велат, непречена истрага.

Дончев, пак, тврди дека од нас разбрал дека постапката што се води во обвинителството по пријава од поранешната сопственичка на Диамед Вера Иванова, освен за злоупотреба на службена положба и уцена, се води и во насока на проверка на сомнение и за кривичното дело – перење на пари. Тој категорично ги отфрла ваквите категоризации, истакнувајќи дека приходот од 50.000 евра од „Ремаркет“ врз основа на консултански услуги што ги давал на „Мегантик“ е целосно законски, бидејќи, како што рече, е пријавен во Управата за јавни приходи и за нив е платен данок. Меѓутоа, тој како јавен функционер не смеел да остварува приход од консултантски услуги.

Имено, Член 44 став 6 од ЗСКСИ пропишува дека службено лице може да остварува приходи само од „научни, наставни, културни, уметнички и спортски активности и приходи од авторски, патентни и слични права, интелектуална и индустриска сопственост…“. Откако ги доставивме податоците со кои располагаме до Комисијата за спречување на корупција и судир на интереси, од таму ни одговорија дека изнесените наводи се доволни за поставување од причина што Дончев не ги пријавил овие приходи во анкетниот лист. Претседателката Билјана Јовановска денеска изјави дека се работи на случајот.