43 годишен пациент со КОВИД-19 е тргнат од распиратор во ГОБ„ 8 Септември“, дознава НОВА. Станува збор за пациент од Тетово кој во тешка состојба бил примен во болницата и на респираторна машина бил поставен на 6 мај, се до 17(вчера) кога е ослободен од респираторната машина и почнал слободно да дише. Ова е втор пациент кој станал од респиратор во државата. До овој случај ниту еден од пациентите со коронавирус кои беа на респираторна машина не преживеа.
Информацијата за НОВА, ја потврди директорот проф. д-р. Христијан Костов. Тој објасни дека овој пациент бил примен во многу тешка состојба, со пневмонија и ренген снимка типична за болеста, со побелени бели дробови исполнети со слуз.
„Пациентот беше во многу тешка состојба, поставен на СИПАП маска(контролирана вентилација). Интубиран е на 6 мај, екстубиран на 17 мај. Тој се чувствува добро, земен му е брис и доколку биде негативен ќе биде префрлен на одделот каде што се негативните случаи и откога ќе се опорави ќе биде пуштен дома“, изјави за НОВА, директорот проф. д-р.Костов.
Овој успех е постигнат благодарение на целиот медицински персонал кој макотрпно по 24 часа се грижи за најтешко болните со коронавирс, потенцира директорот на оваа најголема болница во државата.
проф.д-р. Христијан Костов, директор на ГОБ “8 Септември.
Пациентот примал комбинирана терапија која им се дава на пациентите во зависност од индикациите, како и озонска терапија. Кога се разбудил, веднаш побарал да јаде и се чувствувал добро.
Досега, во Ковид центарот, 1о пациенти примале озонска терапија. Директорот проф. д-р. Костов вели дека озонирањето на крвта го правеле кај најтешко болните.
„Озонска терапија примија 1о пациенти, по 5 пати им е направено озонирање на крвта. Оваа дополнителна терапија ја даваме на најтешко болните. Ќе продолжиме и понатаму со озонска терапија, се снаоѓаме за материјали, имаме “, изјави проф.д-р. Христијан Костов, директор на ГОБ„ 8 Септември“.
Инаку , на 5 мај во оваа болница беше тргнат од респиратор првиот пациент (37 годишен)кој пред два дена по потврдените два негативни тестови си замина дома.
Во ГОБ „8 септември“ се примени седум нови случаи со КОВИД-19, а вкупно се хоспитализирани 20 пациенти. На респиратор се шест пациенти, со потешка клиничка слика се уште двајца. На одделот за интензивна нега каде што се наоѓаат најтешко болните, синоќа починале двајца пациенти.
Во моментот во болницата има 70 суспектни пациенти кои со температура биле примени како итни случаи заради други здравствени проблеми. Во болницата велат дека итните случаи не се враќаат, се оперираат или се интервенира во зависност тоа што е потребно. Од таму велат дека имаат пацинети со инфаркт, со абдоменални здравствени проблеми, фрактури. Операциите кои не беа итни беа ставени на чекање, но најавуваат дека се екипираат за да почнат да вршат и операции од елективна патологија, односно кои биле закажани.
Како што веќе објави НОВА, За околу една недела ГОБ „8 Септември“, ќе ги отвори амбулантите и ќе започне да функционира нормално со што ќе стави во служба на сите пациенти, не само со КОВИД-19, кога се очекува да бидат завршени сите технички зафати во делот каде што ќе биде префрлен центарот за КОВИД -19.
Со планот е предвидено инфективното и кожното одделение, кое сега е преселено, како и делот каде што беше дијализата, да бидат исклучиво за пациентите со коронавирус, а првиот спрат каде што порано се наоѓаше кардиохирургија на Жан Митрев, да биде интензивна нега за најтешко болните во која ќе има 20 респиратори.
