Американската новинска агенција Асошиетед прес синоќа објави дека претседателот на Србија Александар Вучиќ, му дал отворена поддршка на претседателот на САД Доналд Трамп, што е ретко од некој европски лидер. „Обезбедувајќи ретка отворена поддршка од лидер во Европа, претседателот на Србија вели дека претседателот Трамп се соочува со сериозен и тежок непријател додека се обидува да ги спречи масовните протести за насилната смрт на Џорџ Флојд“, наведува АП.
Агенцијата го цитира Вучиќ кој вели дека „се надева оти Соединетите држави ќе излезат од кризата“ и дека му посакува на Трамп „се најдобро“. Смртта на Афроамериканецот Џорџ Флојд, по полициска интервенција, предизвика масовни демонстрации против расизмот и полициската бруталност во Соединетите држави, кои со денови беа проследени со насилство. Протестите во изминативе денови се проширија и низ светот.
