Директорот на јавното претријатие за државни патишта (ЈПДП) Зоран Китанов и градоначалникот на општина Желино Блерим Сејдиу денеска разговараа за претстојната реконструкција на регионалниот пат р402 од Тетово до Групчин, попознат како стар пат Тетово – Скопје. Китанов истакна дека после 30 години, првпат се прави целосна реконструкција на оваа делница што планираат да почне за пет дена.
-Станува збор за целосна реконструкција на потегот од Карпалак до Желино. До пред една година имаше потфат на еден сегмент, но најбитно е што е многу оштетен во овие 30 години и сега одиме со целосна реконструкција. Тој е дел од проектот на ЈПДП со Европска банка за обнова и развој ЕБРД за 25 патни правци кои се критични а со голема фреквенција, рече Китанов.
Директорот додаде дека патот е проектиран лани, а годинава ситуацијата со Ковид-19 е причина градежните работи да започнат подоцна од предвиденото.
-Вработените во ЕБРД работеа од дома, тоа беше причина за пролонгирање на постапката. Но сета документација е завршена, избран е изведувач и има добиено насоки да се подготвува бидејќи очекуваме за пет дена да се почне со работа. Тоа значи дека ќе има и времен режим на сообраќај, што значи дека ќе се работи и ќе се вози, па апелирам граѓаните да бидат трпеливи, рече Китанов.
Општина Желино лани работеше на санација на дупките на патот.
-Конечно по 30 години се реконструира овој пат. Делницата е една од најфреквентните во регионот. Има многу бизниси долж патот и луѓе кои одат на работа, а воедно се користи и од граѓаните кои од Тетово и Гостивар работат во Скопје, како и луѓе кои по потреба одат за главниот град, рече Блерим Сејдиу, градоначалник на Желино.
Директорот на ЈПДП истакна во тековните нивните активности е исчистен сметот долж автопатот Скопе-Тетово-Гостивар, при што за носење се користени 15 камионски превози и апелираше граѓаните да ја одржат чистата средина.
