Пишува Убавка Јаневска
Реценцираме вест објавена на 17 јули, годинава, на порталот Денешен весник со наслов „Можеме“ во изминатите 24 часа: Пет починати, 164 позитивни од 1612 тестови?
Се остава впечаток дека победничката изборна коалиција „Можеме“, на штотуку завршените Парламентарни избори во државата, на некаков начин се поврзува со дневна статистика за состојбата со бројот на починати и новозаболени граѓани во државата како и со бројот на направени 1612 тестови со Ковид-19.
Коалицијата „Можеме“ нема никаква поврзаност со оваа проблематика. Дневните извештаи ги подготвуваат и објавуваат здравствените институции конкретно Министерството за здравство и Институтот за јавно здравје. Тие за нивната транспарентнa работа веќе ги добија оценките на Канцеларијата на Светската здравствена организација во земјава кои гласат: Северна Македонија е меѓу земјите кои се најтранспарентни во споделувањето на националните бројки и статистиките.
Конкретно, во посочениот наслов, за објективно информирање на граѓаните потребно е порталот да ја соопши и бројката од 74 оздравени пациенти што ја содржи текстот во вториот пасус.
Вака објавен наслов на читателите им прикажува само половична, наместо целосна слика на состојбата за најзначајната тема од јавен интерес.
Од почетокот на епидемијата со коронавирус во државата ваков пристап во начинот на информирање на граѓаните е забележан како во дел од онлајн медиумите така и во вестите на дел од телевизиите.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
Овој напис е изработен во рамките на Проектот за зголемување на отчетноста и одговорноста на политичарите и партиите пред граѓаните, Вистиномер, имплементиран од Метаморфозис. Написот e овозможен со поддршка на американската непрофитна фондација (NED – National Endowment for Democracy). Содржината на рецензијата е одговорност на авторот и не ги одразува ставовите на Метаморфозис и National Endowment for Democracy или нивните партнери
