Потпретседателот на владата на РФ Татјана Голикова прецизираше дека оваа втора вакцина се разликува од првата, т.е. од „Спутник V“, која беше регистрирана во август 2020 година. Во создавањето на првата вакцина е искористен вирусот-носител кој ја доставува во човековиот организам генетската информација за коронавирусот и предизвикува во него одговор на имуниот систем. Таквата вакцина се вика векторска.
Повеќе околу тоа: Што се знае за првата регистрирана вакцина за КОВИД-19
„ЕпиВакКорона“ не содржи вирус-носител, туку вештачки споени кратки фрагменти на вирусни протеини и пептиди, преку кои „имуниот систем се обучува и потоа го препознава и неутрализира вирусот“, објасни Голикова.
Вакцината пред регистрацијата помина две фази клинички испитувања, објасни генералниот директор на „Вектор“ Ринат Максјутов. Во првото испитување учествуваа 14 доброволци кои знаеја каков препарат примаат. Во втората фаза учествуваа 86 лица, од тоа 43 примија вакцина „ЕпиВакКорона“, а другите 43 плацебо.
„Сите учесници во испитувањето се чувствуваат добро. Кај две лица по 24 часа се појави помала и краткотрајна болка на местото на убодот. Реакцијата е очекувана затоа што вакцината содржи алуминиум-хидроксид“, рече Максјутов.
Вакцината треба да се појави во продажба од 1 јануари 2021 година, по третиот круг испитувања, се соопштува на сајтот на Државниот регистар на лековити средства.
Во првата фаза на испитувања е и третата руска вакцина, која е создадена во Центарот за истражувања и развој на имунобиолошки препарати „Чумаков“ при Руската академија на науки. Според Ајдар Ишмухаметов, генералниот директор на овој научен центар, таа вакцина потенцијално може да обезбеди имунитет од Covid-19 кој ќе трае со децении.
