Европската унија не смее да биде утопија туку практични вредности кои треба да ги исполнеме, истакна претседателот на ВМРО-ДПМНЕ, Христијан Мицкоски на вчерашната конференција „Конзервативните народни партии градат мостови кон заедничка европска иднина“ во организација на Фондацијата Конрад Аденауер.
-Сите нас овде кои сме присутни не поврзува тоа што сакаме да бидеме дел од Европската унија и веруваме во европската иднина, но веруваме и во просперитетот на регионот, нам претставниците на македонската опозиција не поврзува една карактеристика и овде и во регионот, а тоа е што имаме неодговорни влади кои ја злоупотребуваат европската идеја за лични интереси и газење на европските вредности за кои ние денеска се залагаме, истакна проф.д-р Христијан Мицкоски.
Претседателот Христијан Мицкоски истакна дека далеку од доволно е да го слушнеме македонскиот премиер како вели дека градиме едно општество за сите, а како тоа го прави, со тоа што граѓаните без разлика на етничката припадност се поделени до таа мера што не разговараат едни со други, корупцијата и криминалот се двигатели наместо квалитетот и компетенциите.
-Регионот нема да има напредок ако европските вредности останат само флоскула, без дела, празни зборови кои владите ќе ги изговараат, а нема да ги применуваат, а тоа не е доволно. Денес, Македонците исто како и Албанците, Турците, Ромите, Власите, Србите, Бошњаците и сите останатите граѓани имаат еден сон како да имаат подобар живот, а тоа е така затоа што тешко живеат. Затоа младите си заминуваат и ја бараат својата среќа во други земји, градовите низ Македонија се празни – говореше Мицкоски.
Мицкоски говореше за разликите кои иако ги имаат политичките партии за кои рече дека се помали од заедничката цел, а тоа е да ја придвижиме државата и регионот кон Европката унија, и истото може да биде направено доколку се дејствува обединето, заеднички верувајќи во една идеја, затоа што граѓаните се уморни од ветувања, лаги и неспособност, како и постојано чекање во европската чекалница и верувања во сон кој никако да дојде.
-Триесет години чекаме подобро утре, имаме Влада која функционира на лаги и измами, која не знае и не може да донесе европска иднина затоа што се непријатели на европската идеја, не можеме во Европа со девастирано образование, со руинирано здравство во кое луѓе умираат пред да добијат здравствена нега, дополни Мицкоски.
Тој се осврна и на соживот во Македонија и потенцираше дека граѓаните се уморни од лагите на власта, па по тоа не е доволно само власта да кажува дека соживотот е важен, туку што прави таа за да ги зближи граѓаните, потреби се дела, затоа што со лаги не може понатаму, а власта ништо не прави за да обезбеди европска идинина и да се зачува соживотот на граѓаните.
-Не е точно дека сите политичари се исти, ние вистински веруваме во Европа, ние сме за подобар живот, а власта имаше шанса да направи подобар живот, но шансата ја упропасти, нашите европски политичари треба да ја ценат важноста за интеграција во регионот, како и одблиску да ги следат процесите, да инвестираат во политики кои носат резултати, како и да не подржуваат едностани политичари кои се далеку од европската идеја – посочи Мицкоски.
Мицкоски потенцираше дека Македонија не смее да остане зад портите на ЕУ и упати убедување дека вчерашната конференција е основа за добра соработка и подадена рака во насока на менување на работите за европската перспектива.
На конференцијата свое обраќање имаше и г-дин Пауло Рангел, заменик претседател на Европската Народна Партија (ЕПП) кој истакна дека од суштинско значење е соработката на сите партии од сите етнички заедници како и потребата од силна проевропска опозиција која ќе работи во насока на создавање на реформи и која ќе гради мостови до заедничката европска перспектива на Македонија.
-Добрата соработка на сите партии од сите етнички заедници, како и од регионот е од суштинско значење, ја охрабрувам оваа иницијатива за целите на градење на заедничка цел, за да дојдеме до целосна Европа, затоа што не може да постои целосна Европска унија без Македонија, истакна г-дин Рангел.
Тој говореше дека на Македонија и е потребна силна проевропска опозиција која ќе бара одговорност од Владата, која ќе бара реформи и ќе се бори против корупцијата, како и да биде конкуретна со сите идеи за да се подобри економијата и секојдневниот живот на граѓаните.
Г-дин Рангел потенцираше дека во однос на националните прашања потребен е национален консензус, но и потребно е да се бара национален консензус, иако тоа не секогаш е лесно, но сите треба да го дадат својот придонес затоа што тоа им се должи на граѓаните, како и тоа дека треба да се соработува заеднички во насока на решавање на сите предизвици, особено за заедничките интереси како владеење на правото и создавање на подобар живот на граѓаните.
