Обвинителството поведе постапки за случајот со возачките дозволи

0
56

Постапки против осум лица, вработени во скопското Одделение за управни работи при Министерството за внатрешни работи (МВР), поведе Основното јавно обвинителство Скопје кои се осомничени дека сториле кривично дело – Злоупотреба на службона положба и овластување, соопшти Обвинителството.

Осомничените ја искористиле својата службена положба и овластување за повеќе граѓани креирале барања, спроведувале процедури и одобрувале изработка на возачки дозволи за Б категорија, иако барателите немале положено возачки испит и не се стекнале со право за поседување возачка дозвола, наведува ОЈО.

За еден од осомничените е доставен предлог до Кривичниот суд за определување мерка притвор, поради опасност од бегство и можност да го повтори делото.

„За останатите седуммина предложени се мерки на претпазливост – забрана за напуштање на живеалиштето/престојувалиштето, обврска привремено да се јавуваат во Основниот кривичен суд Скопје, како и забрана за преземање на определени работни активности кои се поврзани со кривичното дело“, велат од Обвинителството.

Надлежниот јавен обвинител поведе и постапка против 31 друго лице кои извршиле поттикнување при извршување на наведеното кривично дело, односно се јавувале како баратели на возачки дозволи, иако немале положено возачки испит, наведуваат од ОЈО.