Етничката припадност во личните карти не престанува да ја бранува јавноста. По бројните спротивставени мислења кои деновиве можеа да се слушнат и од опозициските партии, но и во редовите на владината коалиција, со свој став излезе и претседателот Стево Пендаровски. Тој вели дека лично не се согласува етничката припадност да биде во личните карти – како што е предвидено со предлог-измените на Законот за лични карти што ги поднесе владејачката партија Беса, а за што има претходен договор со СДСМ.
Во интервју за МКД.мк, Пендаровски, сепак, најавува дека веројатно не би ставил вето на новиот закон, доколку тој биде донесен во регуларна постапка. „Ако владејачката коалиција се договори, ако има мнозинство и ако законот биде донесен во регуларна постапка, јас немам многу големи аргументи контра таквиот став за да не потпишам указ. Но, лично не се согласувам етничката припадност да биде во личните карти“, вели Пендаровски. Претседателот смета дека не постои демократска држава во светот во која постои етничка или религиозна припадност.
