Ќе има кривични и прекршочни пријави за протестот кој се одржа минатата недела во Скопје, при што демонстрантите скандираа големоалбански пароли и фрлаа камења. Министерот за внатрешни работи, Оливер Спасовски ова го соопшти денеска откако на дебата за измените во Законот за полиција, пратеникот Бране Петрушевски од ВМРО-ДПМНЕ, кажа дека во изминатиот период полицијата селективно постапувала и го спомена настанот од Вевчани.
„Детално ќе информираме утре или задутре врз основа на тоа што ќе биде сработено и завршено до крај од одделот за насилен криминал и јавното обвинителството. Така што никаде нема состојба каде не се преземаат дејствија. Само се прави процена како и на кој начин да ја зачуваме состојбата на задоволително ниво и да не настанат поголеми штети. Меѓутоа одговорноста секако ќе има“, рече Спасовски.
Протестот се одржа во петок откако во завршните зборови во повторениот судски процес обвинителката Фатиме Фетаи остана на обвинението дека во случајот со петкратното убиство кај Смилковско Езеро од 2012 година, станува збор за тероризам и побара доживотен затвор за тројца обвинети, за двајца максимални затворски казни, а за еден побара ослободителна пресуда. Демонстрантите ја навредуваа Фетаи и бараа нејзина оставка.
ФАКТОР
