Директорот на Центарот за управување со кризи Стојанче Ангелов на денешната прес конференција по вчерашниот фејсбук пост на еден од докторите Павле Зафиров кој учествувал во спасувачката екипа, изјави дека комисијата ќе има задача да утврди каде точно се пропустите и слабостите, за тие да бидат надминати во иднина.
Според Ангелов оперативецот на ЦУК од Кратово, бил фокусиран на барањето за наоѓање теренско возило – џип, па дури и трактор со кој би можело да се отиде до местото, но во ниту еден момент, нити му текнало на оперативецот нити било побарано од него, да се обезбеди хеликоптер за спасувањето.
Запрепастувачки е фактот, нагласи тој, дека во цела општина не можело да се најде теренско возило, кое ќе отиде на лице место и ќе помогне во извлекување на животно загрозениот пациент.
„Оперативецот на ЦУК од Кратово бил фокусиран на наоѓање теренско возило, но во ниту еден момент од него не било побарано да обезбеди хеликоптер. Според стандарнди оперативни оцедури тој не е обучен во ваква ситуација да носи одлука дали треба или не треба хеликоптер. Сепак, како ЦУК овде пронаоѓам една наша слабост, која во иднина ќе биде променета.,“ изјави Ангелов.
Ангелов, најави дека ќе биде разгледано и предлог за одликување на тројцата членови на тимот кој што го извлекоа човекот од животозагрозувачката ситуација.
Докторот Зафиров со вчерашниот пост на социјалната мрежа Фејсбук предивика реакција на многу граѓани но и политичари и функционери. Министерот за надворешни работи Никола Димитров посочи дека е разочаран од непреземањето одговорност.
„Фрапиран сум од оваа ноншалантна демонстрација на префрлање на одговорност. Мислам дека во државава треба да се забрани фразата: не сме надлежни, “ напиша на фејсбук Димитров.
Зафиров кој вчера на социјалната мрежа Фејсбук ја раскажа голготата посочи дека настанот се случил пред неколку дена. По повикот заедно со медицински техничар, шофер и сестра, како и двајца роднини на повредениот се упатиле кон планинското место каде живеел повредениот. Не можеле да стигнат до местото, па по 30-40 километри возење продолжиле пеш.
„За некое чудо, лицето после поминати повеќе од 12 часа на поларна температура во снегот беше сè уште живо, за разлика од овцата која најверојатно имаше излезено да ја врати во трлото по јагнењето. Го имаше најдено неговата 90 годишна мајка која немајќи сила да го крене поминала цела ноќ покрај него обидувајќи се да го загрее. Ние четворицата околу 5 часа на раце го носевме пациентот по козји патеки низ екстремно стрмен предел и шума наместа затрупани со снег, преку река и низ нагорница која ретко кој би се осмелил да ја помине и пеш“, рече лекарот, кој наведува дека се решил настанот да го раскаже јавно за да алармира колку е нефункционален системот.
