Раул Кастро штотуку потврди дека се повлекува од функцијата шеф на Кубанската комунистичка партија, со што се стави крај на ерата што тој и неговиот брат Фидел Кастро ја започнаа со револуцијата во 1959 година, пренесува АП.
Кастро не открил кого ќе го поддржува како негов наследник како прв генерален секретар на Комунистичката партија, но претходно навестил дека неговиот миленик е Мигел Дијаз-Канел, кој го наследи на функцијата претседател во 2018 година.
„Сонувајте и продолжете ја државата: денес го започнуваме нашиот осми конгрес на Комунистичката партија“, напиша порано на Твитер кубанскиот претседател Дијаз-Канел, кој беше поканет да ја преземе политичката група.
Тоа е „конгрес на континуитет“, додаде Дијаз-Канел, нагласувајќи дека насоката на владата во Куба, една од последните пет комунистички држави, нема да се промени, пренесува агенцијата Франс прес.
По смртта на Фидел Кастро во 2016 година и сега пензионирањето на неговиот 89-годишен брат Раул, се врти нова страница во политиката на Куба и нејзините граѓани, од кои многумина целиот нивен живот ја знаат само моќта на славното револуционерно семејство, додава АФП.
„Раул повеќе нема да биде шеф на партијата, но во случај на проблеми, Раул ќе биде таму, тој не е мртов“, рече Рамон Бланд, 84-годишен комунист.
Тој верува дека 60-годишниот Дијаз-Канел е „сè уште доволно млад“, но дека го чекаат „проблеми“.
Неколку стотици делегати од сите кубански провинции денеска се собраа во главниот град Хавана, за да разговараат за важни теми за земјата.
Нивната седница зад затворени врати се одржува точно на денот кога Фидел го објави социјалистичкиот карактер на Кубанската револуција пред 60 години.
За разлика од претходните конгреси, овој пат нема телевизиски пренос. Официјалниот портал Кубадебат објави дека Раул Кастро, откако му оддал почит на својот брат, го претставил извештајот на Конгресот пред делегатите.
Назначувањето на Дијаз-Канел за генерален секретар на Комунистичката партија, најважната функција во земјата, се очекува на последниот ден од конгресот, во понеделник.
На Куба и честитале и другите комунистички земји – Кина, Виетнам, Лаос и Северна Кореја.
За тоа време, жителите на кубанските улици, испразнети од туристи поради пандемијата, се загрижени поради недостигот на храна, редиците во продавниците и високата инфлација.
За Норман Мекеј, аналитичар во единицата „Економист интелигенс“, „заминувањето на Раул е важен настан, не само затоа што и стави крај на династијата која траеше 50 години, туку и затоа што се одвива во тежок период на економски турбуленции“.
„Ова не значи дека нужно ќе има големи промени во стилот на управување со Комунистичката партија, но може да има барања за поголема транспарентност и слобода, кои партијата ќе биде тешко да ги игнорира, рече Мекеј.
Политичкиот аналитичар Харолд Карденс, пак, нагласува дека кубанското општество има „чувство на замор“ предизвикано од комбинација на политиката на максимален притисок врз Куба од страна на поранешниот американски претседател Доналд Трамп и падот на довербата во кубанските лидерски проекти.
