Во извештајот се наведува дека имало „чести случаи на политичари кои инструментализираа опасна реторика за политичка добивка“.
Бугарското националистичко размислување ги блокираше преговорите за пристапување на Северна Македонија во Европската Унија, се нотира во најновиот извештај на Фридом хаус „Земји во транзиција 2021 година“, кој годинава е објавен под наслов „Антидемократски пресврт“. Во него се посочува дека изминатиот период имало „чести случаи на политичари кои инструментализираа опасна реторика за политичка добивка – како што е бугарското националистичко размислување за блокирање на преговорите за пристапување кон Северна Македонија во Европската унија (ЕУ).
„Бугарија исто така започна кампања со закани против Северна Македонија, ветувајќи дека ќе ги блокира нејзините разговори за пристапување во ЕУ доколку не успее да ги реши историските спорови со Бугарија – и покрај тоа што се постави како главен поддржувач на евро-атлантските интеграции на Скопје. Ова кулминираше со експлицитно вето против разговорите во ноември, помагајќи да се одложат, со тоа што Бугарија го поддржа ветувањето од 2019 година дека ќе го сврти својот курс за надворешна политика за Северна Македонија (оној што го забрза нејзиниот европски пат), освен ако не бидат исполнети повеќе билатерални барања“.
За разлика од Бугарија, којашто заедно со Летонија и Црна Гора, има десетти најголем пад на демократските параметри во последните четири години, според Фридом Хаус, Северна Македонија и Узбекистан се издвоени како две држави во транзиција со најголем демократски напредок изминатата година. Земјата има подобрување од 0,07 поени, што е втор најдобар резултат од вкупно 29 земји кои се анализираат во извештајот. Сепак, и покрај ова подобрување, С. Македонија и понатаму останува во групата на држави кои имаат „хибриден режим“.
„Во Северна Македонија и Узбекистан делумните напори вродија со позитивни промени во реалноста, што беа причина за подобрување на резултатите на овие држави. (…) Во Северна Македонија, центар-левичарската Влада на премиерот Зоран Заев поправи дел од институционалните штети кои ги направија нивните десничарско-популистички претходници, а и понатаму има можност да ги испорачаат придобивките од демократијата“, се вели во извештајот.
Северна Македонија има најдобра оценка во областа на граѓанското општество (4,75), а најлошата во областите на судската рамка и независноста и корупцијата (3,25). Корупцијата, според извештајот, останува сериозен проблем и има широко распространета неказнивост за корупција на владини функционери, вклучувајќи и членови на парламентот и луѓе од судството.
Извор DW
