ПРОДОЛЖУВААТ РАКЕТИРАЊАТА И МЕЃУСЕБНИТЕ ОБВИНУВАЊА

Новата рунда на судири на Блискиот исток влегува во втората недела. Радикалниот Хамас и израелската армија ноќеска повторно ракетираа цели во Израел и во Појасот Газа.

Израелската армија ноќеска испука десетина ракети на Појасот Газа, соопштувајќи дека гаѓала „терористички цели“. Наводно, уништени се куќите на деветмина високи офицери на радикалниот Хамас кои биле користени и како магацини за муниција. Како што се наведува, тоа била реакција на ракетирањето на израелските градови Бершеба и Ашелон околу полноќ.

Според локалните медиуми од Газа, погодена е и крајбрежната улица западно од градот Газа, а оштетен е и далекуводот кој со електрична енергија го снабдува југот на оваа палестинска област. Сѐ уште не е наведен бројот на жртви.

Најмалку 197 лица во Појасот Газа се убиени во конфликтот кој трае веќе една недела, наведува тамошното министерство за здравство.