Владата и покрај тврдењата на бугарската страна, не признава дека презентирала пред властите во Софија конкретни предлози за решавање на спорот. Еден ден откако делегацијата предводена од Зоран Заев се сретна со државните и политичките лидери во Бугарија, извршната власт вели дека посетата била за унапредување на дијалогот и соработката, но врз основа на португалскиот предлог.
„Овој позитивен чекор ни овозможи да разговараме за можностите за решенија за кои португалскиот предлог е добра основа. Решенијата треба да бидат одговорни пред двете страни, односно да се однесуваат на прашања што се важни и за Северна Македонија и за Бугарија. Шпекулациите за наводни формулации за решенија објавени во одредени медиуми, не се точни“, велат од Владата.
Овој став е во спротивност со изјавата на бугарскиот премиер Стефан Јанев, кој во присуство на Заев за медиумите изјави дека Скопје дошло на состанок со предлог кој ќе го разгледаат. Бугарските медиуми во текот на денот известуваа за пет формулации кои Заев ги предложил на бугарската страна за решение. Според извори на „24 часа“, една формулација за јазичниот спор предвидува Бугарите и Македонците дека зборуваат на ист јазик исто време, но и на различни јазици, кои се признати ширум светот. Оваа формулација предвидува и изјава дека двата народа се браќа. Весникот „Труд“ пишува дека Заев условувал со предложување на патна мапа. Овој медиум соопшти дека „На средбата со Јанев, Заев ветил дека доколку Бугарија ги поддржи почетокот на преговорите со Северна Македонија во Брисел на 22 јуни, ќе направи компромис за историски прашања и ќе го забрза проектот за железницата Гуешево – Скопје“. Медиумите во соседната држава понатаму известуваат дека е нејасно продолжувањето на работата на заедничката комисија. Копретседавачот на комисијата од бугарска страна, Ангел Димитров, за медиумите во Софија изјави дека вчера ова прашање не беше многу третирано бидејќи не беше постигнат напредок во Комисијата.
„На барање на нашите колеги, нашиот следен состанок ќе биде во октомври. Скоро ништо не е исполнето од Договорот за добрососедство, затоа претпоставувам дека Скопје ќе вложи напори да покаже подготвеност да направи одреден напредок во други области како што се инфраструктурата, итн. За сите клаузули од договор, стагнацијата е неверојатна. Не гледам како ќе се случи катарзата потребна за историската наука и општеството како целина ако нема политичка одговорност за тоа, но исто така и одговорност на науката“, изјави Ангел Димитров, заедничка комисија Скопје – Софија.
За време на неговата посета на Самитот на Западен Балкан во Виена, премиерот Заев се надеваше на брз договор.
Бугарското Министерство за надворешни работи во средата соопшти дека нивниот став во врска со одржувањето на меѓувладината конференција останува непроменет, бидејќи рамката за преговори треба да содржи гаранции за спроведување на договорот од 2017 година, кои во моментов не постојат.
АЛСАТМ
