Се предлага и укинување на ограничувањето до 100 гости на свадби и дозвола за концерти и настани на отворено
Комисијата за заразни болести утрово на состанок донела одлука да препорача укинување на полицискиот час од среда (16 јуни), информираше министерот за здравство Венко Филипче.
Укинувањето е предложено бидејќи, вели Филипче, епидемиолошката состојба е стабилна и го дозволува тоа.
Исто така, се предлага и укинување на ограничувањето да има максимум 100 гости на свадби и други прослави.
Комисијата за заразни болести даде зелено светло и за организација на настани, концерти и забави во клубовите и локалите само на отворено, со капацитет до максимум 50% од капацитетот на објектот и не повеќе од 1 000 лица.
Овие одлуки ќе му бидат предложени на Кризниот штаб, кој, ако ги прифати, ќе ги препорача до Владата за усвојување.
