Навреме свидетелства ќе добијат учениците кои завршија девето одделение и матурантите бидејќи им се потребни за упис во средно училиште и за факултет. За останатите ученици Бирото за развој на образованието дополнително ќе информира кога ќе бидат поделени свидетелствата. Неофицијално, според информациите на СОНК, станува збор за незавршен тендер или за проблем со тендерската постапка за печатење на свидетелствата и се очекува учениците свидетелствата да ги добијат до 31 август.
Во СОНК велат дека најверојатно станува проблем со тендерот за печатење на свидетелствата што е во надлежност на Бирото за развој, имајќи предвид дека свидетелствата се бесплатни за учениците и затоа е потребна таа процедура.
Од СОНК додаваат дека овој проблем ќе создаде нов проблем – кога наставниците во јули или во август ќе бидат на годишен одмор од нив ќе биде барано да ги внесуваат оценките во електронскиот систем за потоа да бидат испечатени свидетелствата.
Сојузот на средношколци реагира дека не се објаснети причините за проблемот со свидетелствата и потсетуваат дека иако тие се бесплатни, во некои училишта од децата беа барани пари за нивно издавање. Сојузот очекува веќе утре да биде завршен извештајот на Државниот просветен инспекторат за наплаќањето на свидетелствата.
