Правата на Бугарите во Македонија е новиот фокус на бугарските политичари врз кој ќе ја градат политика кон земјава, но и условување во евроинтегративните процеси. Откако вчера бугарскиот претседател во заминување и кандидат за нов мандат за истата позиција, Румен Радев, отворено кажа дека ветото за Македонија во ЕУ е поради непочитувањето на правата на Бугарите, со барање тие да влезат во македонскиот Устав, денеска на иста линија застана и поранешниот бугарски премиер, Бојко Борисов, чија партија претендира повторно да ја освои власта во Бугарија. За Борисов прашањето меѓу Бугарија и Македонија не е нерешливо, но само доколку Бугарите влезат во македонскиот Устав.
ТОА СЕ МАЛИ РАБОТИ. СО ЕДНО РЕШЕНИЕ НА ПАРЛАМЕНТОТ СЕ ПРАВИ ПРОМЕНАТА И СЕ ВМЕТНУВААТ БУГАРИТЕ, КАКО ШТО СЕ СРБИТЕ, БОШЊАЦИТЕ И СИТЕ ДРУГИ И ГИ ПРОДОЛЖУВАМЕ РАЗГОВОРИТЕ ЗА СУШТИНСКИТЕ ТЕМИ. ОВА Е ЗАДОЛЖИТЕЛНО, ЈАС НЕ ЗНАМ И ЗОШТО ДИСКУТИРАМЕ ЗА ОВА. И АКО НЕ СЕ СВЕСНИ ЗА ТОА НИ МИЦКОСКИ НИ ЗАЕВ…, Е СТАВОТ НА БОРИСОВ.
Борисов овој услов рече дека била причината за бугарскотот „не“ за Македонија упатувајќи критика до македонските политичари што не ги користата македонските Бугари како мост на пријателство меѓу двете земји.
ЈАС ПРОСТО ИМ СЕ ЧУДАМ И НА ПАМЕТОТ, НО ТОА Е ПРОБЛЕМ НА МНОГУ СОВРЕМЕНИ ПОЛИТИЧАРИ… СО ТОА МОЖАМ ДА ЗАКЛУЧАМ ДЕКА ИМАТЕ ЦЕЛОСНА ГАРАНЦИЈА ШТО СМЕ ЈА ИСКАЖАЛЕ – ДА ЗНААТ ДЕКА ЗА ДА ЈА ИМААТ НАШАТА ПОДДРШКА, БЕЗ ОГЛЕД ДАЛИ СМЕ НА ВЛАСТ ИЛИ ВО ОПОЗИЦИЈА, МАЛЦИНСТВОТО ТРЕБА ДА БИДЕ ПИШАНО ВО УСТАВОТ. ТОЧКА, РЕЧЕ БОРИСОВ.
Борисов своите ставови ги искажа на средбата со претставниците на шест здруженија и една политичка партија на Бугари во Македонија, кои денеска нему му се пожалија дека не ги уживаат основните човекови права во земјава и трпат говор на омраза, и тие ни нивните деца.
ВО МАКЕДОНИЈА ИМА ЕДНА ПРИФАТЕНА ФОРМУЛА – БУГАРИ ВО МАКЕДОНИЈА НЕМА. ВИЕ ВО МОМЕНТОВ РАЗГОВАРАТЕ СО ЛУЃЕ КОИ НЕ ПОСТОЈАТ СОГЛАСНО МАКЕДОНСКИОТ УСТАВ, ЗАКОН И ОПШТЕСТВЕНО-ПОЛИТИЧКИ МОМЕНТ. НИЕ СМЕ НЕКАКВИ ФАНТОМИ ТУКА ПРЕД ВАС. ИМАМЕ ПРАВО ДА БИДЕМЕ БУГАРОФИЛИ, НО БУГАРИ НЕМАМЕ ПРАВО, ВЕЛИ ПЕТАР КОЛЕВ ПРЕТСЕДАТЕЛ НА ГДУ, ПАРТИЈАТА НА БУГАРИТЕ ВО МАКЕДОНИЈА.
Според нив единствено тоа може да се смени ако Бугарија опстои на своите позиции кон Македонија. Претставниците на Бугарите во Македонија не штедеа на критика за македонските политичари.
СЕ ОБИДОВМЕ ДА МУ ОБЈАСНИМЕ НА ЗАЕВ, ТОЈ СЕ ПРАВИ ДЕКА НЕ СЛУША. СЕ ОБИДОВМЕ ДА МУ ОБЈАСНИМЕ НА МИЦКОСКИ. ЈАС КАКО ПРЕТСЕДАТЕЛ НА ГРАЃАНСКО-ДЕМОКРАТСКАТА УНИЈА СУМ НАПИШАЛ НАД 100 ПИСМА, СО ОФИЦИЈАЛНО ОБРАЌАЊЕ. НИЕ НЕ СМЕ ИМАЛЕ СРЕДБА СО МАКЕДОНСКИОТ ПРЕМИЕР, ТОЈ НЕ САКА ДА СЕ СРЕТНЕ СО НАС. И ПРЕТСЕДАТЕЛОТ НЕ ОДГОВАРА НА НАШИТЕ ПИСМА. НЕ НИ ОДГОВАРА НИ ПЕНДАРОВСКИ. НИЕ МУ ПИШУВАМЕ ПИСМА, ТОЈ ВООПШТО НЕ НИ ОДГОВАРА. КАКО ДА НЕ ПОСТОИМЕ, ВЕЛИ КОЛЕВ.
Од Кабинетот на претседателот Стево Пендаровски за Телма пак информираат средба со Колев имало.
НА БАРАЊЕ НА ПОЛИТИЧКИОТ СУБЈЕКТ ГДУ, ПРЕТСЕДАТЕЛОТ СТЕВО ПЕНДАРОВСКИ СЕ СРЕТНА СО ПРЕТСЕДАТЕЛОТ НА ПАРТИЈАТА, ПЕТАР КОЛЕВ, ПРЕД НЕКОЛКУ МЕСЕЦИ, СТОИ ВО ОДГОВОРОТ ОД КАБИНЕТОТ НА ШЕФОТ НА ДРЖАВАТА.
Телма за вчерашните ставови изнесени од бугарскиот претседател Радев, но и денеска од поранешниот бугарски премиер, Борисов, кој е и потписник на Договорот за добрососедство од 2017, побара реакција и од Владата. Од таму попладнево стигна соопштение во кое се наведува:
„ИМАМЕ РАЗБИРАЊЕ ЗА ВНАТРЕШНА ПОЛИТИЧКА ПРЕДИЗБОРНА СОСТОЈБА ВО БУГАРИЈА И КОМПЛИЦИРАНИОТ ИЗБОРЕН ТЕК, НО СМЕТАМЕ ДЕКА ТОА НЕ Е ПРИЧИНА ЗА ПОЛИТИЧКИ ПОРАКИ ЗА КАМПАЊСКИ ПОТРЕБИ КОИ ИЗЛЕГУВААТ ОД РАМКАТА НА ЕВРОПСКИТЕ ВРЕДНОСТИ И ПРИНЦИПИ ЗА ПОЧИТУВАЊЕ НА КОЈ Е ИЗГРАДЕН ДОГОВОРОТ ЗА ПРИЈАТЕЛСТВО, ДОБРОСОСЕДСТВО И СОРАБОТКА. ТАКВИТЕ ТОНОВИ НЕ СЕ ДОЖИВУВААТ КАКО ПРИЈАТЕЛСКИ ОД СТРАНА НА МАКЕДОНСКИТЕ ГРАЃАНИ“, СЕ НАВЕДУВА ВО СООПШТЕНИЕТО.
Меѓу другото од владата очекуваат и соседите да не и се мешаат во внатрешните работи, но во соопштението нема ни збор за обвинувањата за дискриминација од здруженијата и партијата на Бугарите во Македонија.
Инаку шесте здруженија чии претставници два дена имаа средби со бугарските политичари, од кои бараат помош да се подобри нивната положба во Македонија, се Културниот центар „Иван Михајлов“ од Битола регистрирано во март 2019, „Трибуна“ од Прилеп регистрирано на 29 декември 2020 и само еден ден потоа регистрираната фондација „Единство“ од Кочани, здружението „Интеракција“ од Охрид од 2012 и Македонското-бугарско пријателство од Скопје од 2016 година, како и здружението „Коридор -8“ од Скопје регистрирано во 2013.
ТЕЛМА ТЕЛЕВИЗИЈА
