Нова влада најдоцна до 18-ти јануари, Ковачевски најави и борба против внатрепартискиот клиентелизам

Откако претседателот на СДСМ, Димитар Ковачевски вечерва на Централниот одбор на партијата ја доби довербата да биде мандатар најави дека првата задача на новото раководство на партијата е да состави нова влада најдоцна до 18 јануари.

Ковачевски изјави дека новата влада ќе биде ориентирана на економијата, заштитата на здравјето, како и финансиската поддршка и продолжување на евроинтеграцискиот процес и преговорите со соседна Бугарија.

Ќе ја реформира и реорганизираме партијата , најави Ковачевски и рече дека ќе се формира советодавно тело, Совет за креирање и имплементирање политики, за да ги надгледува проектите на партијата, а со него ќе раководи поранешниот пратеник и екс партиски потпретседател Игор Ивановски.

„Понатаму започнуваме процес на целосно отфрлање на внатрепартискиот клиентелизам. Ова е предизвик на кој СДСМ сериозно ќе работи и ќе биде предводник во отфрлање на клиентелизмот во секој сегмент од општетсвеното работење. Одлики на новото раководство ќе бидат одговорност, ефикасност и чесно работење, со личен пример да покажеме што значи правна држава, а не само со реформи и нови закони,“ рече Ковачевски.

За опозиционата ВМРО-ДПМНЕ рече дека е партија која ја водат поединци кои се обидуваат да одговарат на личните, а не на државните интереси.