Владејачката СДСМ тврди дека лага е дека Итната помош ќе се приватизира
Измените на Законот за здравствена заштита не предвидуваат приватизација на Итната помош, туку амубулантните возила на итната медицинска помош на Приватните здравствени устануви ќе им бидат на располагање на граѓаните бесплатно, објаснуваат од Министерството за здравство за Фокус, откако Левица поднесе 1.200 амандмани на измените тврдејќи дека власта сака да ја приватизира Итната помош.
-Измените на Законот за здравствена заштита во делот со Итната помош не предвидуваат приватизација на истата туку Законот ќе овозможи да се стават во законска рамка Приватните здравствени установи кои даваат итна помош на граѓаните, тоа што веќе се случува.
Законската измена не ги изложува граѓаните на дополнителни финансиски торшоци, туку напротив амбулантните возила на итната медицинска помош на Приватните здравствени установи ќе им бидат ставени на располагање на граѓаните, објаснуваат од Министерството за здравство.
Денешната комисија за здравство беше прекината поради големиот број на амандмани, а владејачката СДСМ тврди дека лага е дека Итната помош ќе се приватизира.
-Со овој закон се овозможува граѓаните во руралните средини да имаат достапна и постојана здравствена заштита. Измените на Законот за здравствена заштита во делот со Итна медицинска помош ќе овозможат зголемување на ресурсите на Брзата Помош како и законско регулирање на услугата која со години наназад ја дават приватните здравствени установи, изјави Соња Михаиловска, пратеничка на СДСМ.
Од партијата и од МЗ тврдат дека измените на Законот во делот на трансплантацијата биле повлечени уште минатата недела по аманндманска интервенција. Оттаму најавуваат и јавна расправа за измените на Законот на предлог на пратеничките групи на СДСМ и ДУИ.
Пратениците на Левица, Димитар Апасиев и Борислав Крмов денеска поднесоа над 1.200 амандамни до Комисијата за здравство, за како што велат, да го спречат министерот за здравство, Венко Филипче, на заминување да отвори можност за приватизација на брзата помош и трансплантацијата на човечки органи.
Против овие измени се и ВМРО-ДПМНЕ кои велат дека МЗ преку болниците може да набави возила и да вработи дополнителен персонал.
-Државата наместо да плаќа се што може сама да направи, плус да исплатува профит, може да го направи сама преку болниците, а за сметка на профитот кој треба да легне на приватни сметки на лица блиски до СДСМ може да ги покачи платите на персоналот кој ќе работи во итната помош, реагираат од ВМРО-ДПМНЕ.
Преземено од Фокус
