Нови разузнувачки податоци на САД: Наскоро ќе има напад

Соединетите Држави и нивните сојузници имаат нови разузнавачки информации кои сугерираат дека Русија би можела да изврши напад врз Украина дури и пред крајот на Олимписките игри, изјавија неколку извори за Си-Ен-Ен.

Претходните проценки сугерираа дека е малку веројатно Русија да почне напад на Украина до крајот на Олимпијадата на 20 февруари.

Американскиот државен секретар Антони Блинкен денеска изјави дека руската инвазија на Украина „може да започне во секое време“, вклучително и за време на Зимските олимписки игри во Пекинг, а САД продолжуваат да „гледаат многу загрижувачки знаци на руска ескалација, вклучително и нови сили што пристигнуваат на украинската граница“.

Киев е меѓу целите идентификувани во рускиот план, велат извори на Си-Ен-Ен. Во тек се дискусии во администрацијата за отстранување на дел од овие нови разузнавачки информации.

Претседателот Бајден требаше да разговара со НАТО и европските сојузници денеска наутро за најновите разузнавачки информации, изјави претставник на Белата куќа за Си-Ен-Ен.

Генералниот секретар на НАТО Јенс Столтенберг уште еднаш предупреди на реалната опасност од нов вооружен конфликт во Европа. „Бројот на руски војници расте, а роковите за предупредување се скратуваат“, изјави денеска Столтенберг во базата Михаил Когалничеану на југоистокот на Романија, во близина на Црното Море, додека западните земји ја обвинуваат Москва дека подготвува воена агресија против Украина.

Голем број земји ги повикаа своите граѓани веднаш да ја напуштат Украина, вклучувајќи ги САД, Јапонија и Холандија.