УНИЦЕФ е сериозно загрижен поради продолжениот прекин на наставата и повикува да се преземат мерки со кои ќе се овозможи децата од основното и средното образование да ја надоместат изгубената настава веднаш по враќањето на училиште. Пропуштеното мора да се надомести за да се избегнат долготрајни штети врз добросостојбата и продуктивноста на децата, е истакнато во нивното соопштение.
„Со години Северна Македонија се соочува со криза во учењето, при што повеќе од половина од учениците на петнаесетгодишна возраст не ги постигнуваат основните нивоа на знаење по читање и математика. Згора на тоа, не беа воведени програми за надоместување на пропустите во наставата предизвикани од затворањето на училиштата поради Ковид-19 и учењето на далечина. Оваа учебна година учениците веќе пропуштија две недели настава поради задоцнетиот почеток на учебната година. Сега, со пролонгираниот штрајк на наставниците, кој влегува во својата трета и евентуално и четврта недела, постои веројатност децата да изгубат до 6 недели настава во оваа учебна година и сето тоа во време кога требаше да се надоместува знаењето пропуштено како последица на Ковид-19“, посочуваат од таму.
Оценуваат дека сега, повеќе од кога било порано, треба да се донесат мерки за надоместување на пропуштеното знаење и за забрзување на образовната реформа за да може да се одговори на образовната криза која му претходеше на Ковид-19. Доколку итно не се преземат вакви мерки, економските последици од пропуштеното во учењето, како што посочуваат од УНИЦЕФ, ќе влијаат на намалена заработувачка во животот на децата од денешната генерација. Овие загуби не само што имаат тековно негативно влијание врз децата, туку ќе влијаат и врз нивниот живот во иднина и идниот економски развој на државата.
„Веднаш по враќањето во училишните клупи, најважно е наставниците да го оценат нивото на знаење на учениците и да им обезбедат настава приспособена на потребите и нивото на детето. Треба да се размисли за мерки од типот на продолжување на времетраењето на наставата, организирање часови за надоместување на пропуштеното, приспособување на наставата за да се задоволат конкретните потреби од учење на учениците и ставање акцент на стекнување клучни вештини. На матурантите ќе им треба дополнителна поддршка да го совладаат материјалот за да може непречено да го продолжат своето школување во повисоките нивоа на образование“, потенцираат од таму.
УНИЦЕФ ги повикува сите учесници во преговорите за платите на образовните работници, пред сè, да го имаат предвид најдобриот интерес на детето, да прифатат дека состојбата со кризата во образованието е алармантна и да изнајдат заемно прифатливи решенија со цел да се спречи создавање идна изгубена генерација, е наведено во информацијата.
