Во објавата неточно се тврди дека високите цени се резултат на тоа што нашата држава одвојува финансиски средства за плаќање на оружјето, логистиката и платениците/војниците кои војуваат против Руската Федерација. Владата досега донела три одлуки за донации на Украина и од безбедносни причини се класифицирани информациите за тоа што и каков вид опрема дониравме. Тоа е сè од воена помош што ѝ имаме испратено на Украина. Нашата држава ниту финансира логистика, ниту војници. Зголемувањето на цените кое што се случува низ целиот свет е резултат на повеќе фактори. Во објавата неточно се тврди дека цените кај нас растат затоа што сме членка на НАТО и дека ако излеземе од сојузот цените ќе се стабилизираат. Многу земји, коишто не се членки на НАТО и ЕУ, исто така, се соочуваат со високи цени затоа што тоа е глобален тренд и причините за растот на цените подеднакво влијаат на сите земји, а не само на изолирани земји членки на одредени сојузи
Објава која се споделува на социјалните мрежи, преку повеќе напишани неточни информации, тврди дека кај нас цените растат и се високи затоа што ја финансираме војната во Украина и затоа што сме членка на НАТО. Ова не е вистина.
Зошто цените рипаат и зошто се толку високи???
Одговорот е краток и едноставен.
Сите држави,коишто ја поддржуваат наци-укро војската,а тоа се ЕУ и Нато државите мора да одвојуваат финансиски средства за плаќање на оружјето,логистиката и платениците/војниците кои војуваат против Руската Федерација.
Па затоа мили мои, да не ве чуди зошто е толку скап животот, ВИЕ ја плаќате војната.
Цените ќе се нормализираат кога Македонија ќе се откаже од таа поддршка и кога ќе излезе од Нато сојузот.
(Да не ве лажат дека нафта немало или жито немало,сето тоа е истиот филм како во корона годините….)
Толку.
Во објавата се тврди дека високите цени се резултат на тоа што нашата држава одвојува финансиски средства за плаќање на оружјето, логистиката и платениците/војниците кои војуваат против Руската Федерација. Тука забележуваме две невистини. Првата е дека Македонија плаќа вакви средства. Владата досега донела три одлуки за донации на Украина и од безбедносни причини се класифицирани информациите за тоа што и каков вид опрема дониравме. Тоа е сè од воена помош што и имаме испратено на Украина. Нашата држава ниту финансира логистика, ниту војници.
Втората дезинформација е дека се војува против Руската Федерација. Напротив, руска војска во февруари влезе и изврши инвазија врз Украина, која е самостојна и независна држава, а не обратно.
Зголемувањето на цените, кое што евидентно се случува во нашата земја, но и низ целиот свет е резултат на повеќе фактори. Инфлација е зголемување на цената на нешто со текот на времето. Секој месец надлежните објавуваат нова бројка која проценува колку цените се зголемуваат севкупно.
Многу работи придонесуваат за високата стапка на инфлација, вклучувајќи: повисоките цени на горивата, зголемувањето на цените на храната, откако лошото време им наштети на жетвата и војната во Украина го погоди производството и трошоците за жито, зголемување на цените на автомобилите, делумно поради недостигот на микрочипови што датира од пандемијата, повисоките кирии и цените на домовите, откако ниските каматни стапки и работата на далечина го заситија пазарот за недвижнини за време на пандемијата како и зголемување на цената на десетици други артикли, вклучувајќи суровини и мебел, од кои многу произлегуваат од производствените и логистичките проблеми поврзани со ковид-19.
Растот на цените на горивата се должи на неколку причини, а една од нив е руската инвазија врз Украина. Цените започнаа да растат пред да започне војната во Украина во февруари годинава, а последиците од руската инвазија дополнително ја влошија ситуацијата. Па така, Русија е еден од најголемите светски извозници на нафта, но се соочува со санкции од европските земји, САД и други големи економии како резултат на нејзините воени акции врз Украина. Ова значи дека побарувачката за нафта од другите производители е зголемена, што автоматски носи и повисоки цени.
Во анализа направена од престижниот магазин Форбс изводени се неколку главни причини зошто цените, особено на храната се високи.
- Пандемиски нарушувања
Пандемијата го наруши речиси секој дел од синџирот на снабдување со храна, вклучително производство, преработка и малопродажба. Тие ефекти врз синџирот на снабдување со храна се чувствуваат и денес.
Кога карантините и забраните за движење ги принудија луѓето да јадат дома, производителите кои работеа со рестораните изгубија клучна база на клиенти, додека продавниците за храна се соочија со огромно зголемување на побарувачката. Многу производители на храна се мачеа во тие рани месеци да ги претворат своите операции за да им служат на потрошувачите на намирници.
Трошоците за производство на храна се зголемија и поради обртот на работната сила, инвестициите за заштита на производите од контаминација и дополнителните трошоци за обука на работниците. Дури и трошоците за транспорт на храна до преработувачите и продавниците за храна се зголемија бидејќи трговците на мало правеа брзи нарачки да ги чуваат полиците полни.
- Војната во Украина
Во раните денови на војната во Украина, аналитичарите шпекулираа дека цените на храната сигурно ќе бидат засегнати, а тие предвидувања се остварија. Русија и Украина се едни од најголемите производители на пченица во светот, задолжени за 30% од вкупниот извоз на пченица.
Но, војната постави очигледни предизвици за Украина да продолжи да извезува пченица. И нејзиното земјоделско производство и извозните способности беа десеткувани од војната: нејзиниот извоз се намали за 92% помеѓу мај 2021 година и мај 2022 година.
Бидејќи Украина не може да ја исполни својата улога како главен производител на пченица, светот се соочува со недостиг. Краткото снабдување значи дека цената на пченицата е многу повисока, што ја прави поскапа обработката на клучните состојки, како што се брашното и скробот. За возврат, производителите на храна мора да ја зголемат цената што ја наплаќаат од потрошувачите за да ги надоместат нивните повисоки трошоци за производство.
- Санкции кон Русија
Поради војната во Украина, западните земји воведоа забрани за руски увоз, вклучувајќи нафта и гас. Повисоките цени на енергијата дополнително ги влошуваат веќе високите трошоци за производство и транспорт на храна што ги предизвика пандемијата.
Во објавата, исто така неточно се тврди дека цените кај нас растат затоа што сме членка на НАТО сојузот и дека ако излеземе од сојузот цените ќе се стабилизираат. Ова нема никаква логика.
Многу земји, коишто не се членки на НАТО и ЕУ, исто така се соочуваат со високи цени затоа што тоа е глобален тренд и причините за растот на цените подеднакво влијаат на сите земји, а не само на изолирани земји членки на одредени сојузи. Прв пример за тоа е нашиот сосед Србија, којашто не е членка на НАТО. И таму инфлацијата се зголемува, а цените секојдневно растат. Потрошувачките цени во август 2022 година, во однос на истиот месец од претходната година, во Србија се зголемени за 13,2 отсто, објави Републичкиот завод за статистика.
Оваа објава изнесува повеќе дезинформации, ги поврзува во еден заклучок и со тоа ја манипулира јавноста да поверува во нешто што не е вистина.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
