Затворите се најкорумпирани од сите институции на системот во Македонија, тврди денеска на прес-конференција директорот на Управата за извршување санкции, Александар Пандов.
Тој вели дека дел од затворските полицајци внесуваат телефони за затворениците, а оние чесните кажуваат дека им биле нудени по неколку илјади евра за на некој затвореник да му внесат телефон во затворот. Пандов појаснуваше дека во македонските затвори има криминалци кои се многу богати, кои парите ги имаат од дрога, шверц на мигранти и друго, па лесно им е да подмитат некого. Некои со пари, а некои со други поволности.
За илустрација, Пандов рече дека бил во посета на хрватските затвори, каде во 2024 година на 1.700 затвореници биле најдени 51 телефон. Кај нас пак, по неколкуте претреси биле најдени над 1.000 телефони.
На идејата за поставување блокатори на сигнал, Пандов вели дека тоа не е изводливо, затоа што околу затвоите има изградено станбени објекти, па блокаторот ќе ги оневозможи и нивните телефони.
– Затворот „Скопје“, односно „Шутка“, како што го знаат граѓаните, кога бил граден, околу него немало никакви објекти. Сега, не знам кој давал дозволи, ама да плукнеш од таа зградата во близина, плунката ќе падне во затворскиот двор“ – опишува Пандов. Вели дека слична е состојбата и со другите македонски затвори, кои се опкружени со станбени објекти, речиси во секој град каде што постојат.
Директорот на Управата за извршување на санкции, Александар Пандов, откри i дека во Казнено-поправната установа Штип затвореници без никакви потешкотии добивале наркотични средства, а во целата ситуација биле инволвирани и затворски полицајци.
Настанот бил целосно регистриран од надзорните камери во установата, а како што потврдија директорот на КПД Штип, Дејан Здравев, и неговиот заменик Ѓорѓи Хубев, видеоматеријалот јасно ја покажува целата постапка.
Според Пандов, на 22 март, во 21.40 часот, во затворот пристигнало возило кое не било евидентирано од затворскиот службеник М.Т., кој и покрај забраната, дозволил автомобилот да влезе до последната капија, што претставува директен пристап до внатрешноста на затворот.
Од возилото излегло едно лице кое фрлило топка преку ѕидот. Веднаш потоа во дворот пристигнале затворениците Ж.Ж., познат на македонската јавност, и Р.К. На снимката се гледа како Ж.Ж. зборува на мобилен телефон додека со другиот затвореник бара нешто во тревникот. Се појавува и затворски полицаец кој им вели дека не смеат да бидат надвор во тој период – изјави Пандов.
Според него, командирот Т.И. веднаш повикал уште петмина затворски полицајци: З.Г., Т.С., С.Ј., М.Т. и С.М. Но наместо да спречат или контролираат што се случува, тие се приклучиле на потрагата.
– Затвореникот Ж.Ж. продолжил да зборува на телефон, иако тоа е строго забрането. Се поздравил со полицајците, кои заедно со него и со светилки почнале да бараат низ тревникот. Тоа што најмногу загрижува е што наместо да го прекинат, му помагаат во потрагата – рече Пандов.
И покрај заедничката акција, „топката“ не била пронајдена веднаш. Следниот ден директорот на затворот издал наредба за детална проверка, при што конечно било откриено дека во топката имало 35 грама кокаин и околу 50 грама марихуана.
– Кога ги прашал полицајците и затворениците што барале, објаснувањето било апсурдно. Тврделе дека затвореникот Ж.Ж. си играл со кучката Цеца, а таа му го зела скапиот часовник што не го пријавил при влез во затворот. Кучката побегнала со него во тревата и тие само му помогнале да го најде – раскажува Пандов.
