На манифестацијата денот на пожарникарите која се одбележа во кругот на Територијалната противпожарна единица Тетово, градоначалничката на Тетово Теута Арифи не остана до крај да ги слушне проблемите на тетовските пожарникари, изнесени од Независниот синдикат на пожарникарите.
-Ние ја информиравме Арифи да остане затоа што и ние доделивме благодарници за нашите колеги кои учествуваа во сообраќајката кај Ласкарци. Но таа замина, изгледа не сакаше да ги слушне нашите проблеми со кои се соочуваме подолг период, рече Игор Гишевски од Независниот синдикат на пожарникарите.
На денот на одбележувањето меѓу тетовските пожарникари присуствуваше и првиот човек на Независниот синдикат на пожарникарите Горан Ристевски. Тој смета дека тетовските пожарникари се соочуваат со низа проблеми, од неисплата на дополнителни часови за работа се до лоши услови за работа.
-Нас не ни се исплаќа за прекувремена работа, работа за празник, и слично. Ние за ова водиме судски спор и ќе видиме на крај што ќе одлучи судот. За жал моравме така да постапиме, затоа што Арифи не сака да разговара за нашите барања, рече Горан Ристевски од Независниот синдикат на пожарникарите.
Градоначалничката на Тетово вели дека за нивните забелешки постои судски спор, и се надева дека ќе заврши во корист на општината.
Тетовските пожарникари за прв пат после десет години добија нови униформи. Во кругот на територијалната противпожарна единица Тетово забележавме нови протипожарни скали кои се донација од странство. На скалите пишува дека се произведени во 1963 година. Како оваа така и другите донации кои ги добива тетовската пожарна се стари и дотраени.
Од Општина Тетово како и многу пати досега, најавија инвестиции во опрема и средства.
