Пописот ќе чини најмалку 522 милиона денари

0
65

 

Собраниската Комисија за европски прашања утре треба да расправа по Предлог-законот за попис на населението, на домаќинствата и на становите во Република Северна Македонија во прво читање, објави Нова Тв

Како што стои во предложениот текст, согласно Законот за државната статистика и петгодишната програма за статистички истражувања 2018-2022, Државниот завод за статистика во април во 2020 година треба да го спроведе деветтиот Попис на населението, на становите и на домаќинствата на територијата на Република Северна Македонија.

Според Предлог-законот, Пописот ќе предизвика финансиски импликации врз државниот Буџет и тоа: оваа година, наредната кога ќе се спроведува попишувањето и во 2021 година (за прибирање, обработка и печатење на податоците од Пописот и нивно дисеминирање). Поради тоа, треба да се обезбедат вкупно 522.751.000 денари од кои 221.315.000 за 2019 година и 301.436.000 за 2020 година.

Во предлог-текстот не пишува колку пари ќе бидат потребни за 2021 година, кога ќе се обработуваат податоците од Пописот.

Вообичаено е пописите да се спроведуваат на секои 10 години, и тоа во годините кои завршуваат на нула или еден. Последниот Попис на населението, домаќинствата и становите во земјава беше спроведен во 2002 година. Во 2011 година почнатиот попис беше прекинат со одлука на Владата, наведува законското решение.

Во изминатиот период државава има спроведено осум пописи на населението: во 1948 година, во 1953 година, во 1961 година, во 1971 година, во 1981 година, во 1991 година, во 1994 година и во 2002 година.