Лидерска во мај, избори во јуни или во јули

0
35

Избори на 28-ми јуни или на 5-ти јули. Ова се термините на кои типуваат партиски кругови, сметајќи дека потребата од вонредна состојба ќе се исцрпи кон средината на мај. Официјално, за сите партии и сите институции приоритетно прашање е здравјето на граѓаните и борбата со вирусот.

Претседателот Стево Пендаровски го прифати предизвикот од ВМРО ДПМНЕ: во првата половина на мај планира да организира лидерска средба на која ќе се разговара за справувањето со короната, вонредната состојба но и за можните термини за парламентарни избори. Од неговиот кабинет потенцираат дека во овој период сите напори и државни ресурси треба да бидат насочени кон справување со пандемијата. Пред истекот на вонредната состојба ќе биде свикан и Советот за безбедност, од кој беше побарано мислење и пред прогласувањето на вонредната состојба.

Лидерската средба ја побара ВМРО ДПМНЕ. Потсетуваат дека првите 30 дена вонредна состојба беа договорени токму во овој формат, па и сега очекуваат сите политички фактори заедно да го побараат излезотт од кризната состојба.

СДСМ смета дека политичките прашања треба да се отворат дури откако ќе се совлада оваа здравствена и економска криза.

Сите позначајни одлуки треба да се донесат консензуално, велат од ДУИ. Како што беа договорени распуштањето на Собранието, предвремените избори, одложувањето на изборите и техничката Влада, така сега треба да се договорат наредните чекори. Важна е консензуалноста и почитувањето на договорено, потенцира ДУИ.

Извор Телма