Болницата „8-ми Септември“, првиот ковид-центар во земјава, останува без двајца анестезиолози што си дале отказ за да заминат во приватна болница.
Па од вкупно 13, сега ќе има 11 анестезиолози, што инаку управуваат со респираторите, на кои се приклучени пациенти што имаат најсериозна клиничка слика на КОВИД. Анестезиолозите, уште во петокот пуштиле барање за да им се потпише отказно решение.
Во „8-ми Септември“ дневно се примаат од 15 до 20 пациенти со тешки симтоми на коронавирусот или веќе потврдени што имаат сериозна манифестација. На респиратор секојдневно се приклучени во просек од 6 до 10 пациенти.
Градската општа болница преку ноќ се претвори во тријажен центар и голема инфективна установа во која се лекуваат најтешките случаи, а на државната клиника наменета за заразни болести сега се третирааат среднотешките и полесните случаи.
Планот на здравствените власти оваа болница да биде ковид-центар во кој ќе се примаат само оние позитивни на вирусот што имаат потреба од итна операција, всушност, никогаш не се реализираше, туку оваа јавна здравствена установа стана ковид-база за најкомплицираните случаи.
Извор Канал5
