Според француските медиуми, мажот бил уапсен околу 13 часот и очигледно сакал да изврши напад сличен на оној што се случи денеска во Ница, каде исламист уби најмалку три лица со нож.
Според медиумите, полицијата била алармирана од таткото на потенцијалниот напаѓач во Сартрувил, па се упатиле кон црквата и брзо го уапсиле.
Поради низата терористички напади во Франција, состојбата на подготвеност е подигната на највисоко ниво, објавија француските власти.
За потсетување, денеска во Франција веќе се случија два терористички напада.
Во Ница, напаѓач кој извикувал „Алаху Акбар“ обезглави жена и уби уште две лица, додека во посебен инцидент полицијата уби маж кој со пиштол им се заканувал на минувачите.
Покрај тоа, бил нападнат и францускиот конзулат во Саудиска Арабија.
Градоначалникот на Ница, Кристијан Естроси на Твитер објави дека нападот се случил во близина на црквата Нотр-Дам и дека полицијата го уапсила напаѓачот.
Се верува дека еден од убиените бил управител на црквата, рече Естроси. Тој додаде дека една жена успеала да избега во барот спроти црквата.
„Осомничениот беше застрелан од полицијата и е на пат кон болницата, тој е жив“, изјави Естроси пред новинарите, опишувајќи го неговото дело како терористички чин.
Тој додаде дека напаѓачот извикувал „Алаху Акбар“ дури и откако полицијата го уапсила.
“Доста беше. Време е Франција да се ослободи од законот за мир за конечно да се исчисти од исламофашизмот на нашата територија”, рече Естроси.
Набргу потоа, француската полиција уби маж во посебен инцидент во Монтфавет, место недалеку од Авињон на југот на Франција, откако им се заканувал на минувачите со пиштол, јави полицијата.
Според француската радио станица Европа 1, човекот исто така извикувал „Алаху Акбар“.
Еден Саудиец е уапсен за благо прободување на чуварот на францускиот конзулат во Саудиска Арабија, објави државната телевизија.
Француската амбасада потврди дека чуварот е пренесен во болница и дека неговиот живот не е во опасност.
Естроси ја најави посетата на францускиот претседател Емануел Макрон во Ница.
Претставниците на Националното собрание во Париз изразија солидарност со жртвите со едноминутно молчење. Градоначалничката на Париз, Ана Идалго, рече дека жителите на Ница „можат да сметаат на поддршката од Париз и Парижаните“.
Извор во полицијата рекол дека жената била обезглавена, а истите информации ги пренела и политичарката Марин Ле Пен. Полицијата потврди дека во нападот загинале три лица и дека неколку лица биле повредени.
Претставник на Францускиот совет за муслиманска вера најостро го осуди нападот. „Во жалост и солидарност со жртвите и нивните најблиски, ги повикувам сите муслимани во Франција да ги откажат прославите на празникот Мавулуд.
Мавулуд е празник на раѓањето на пророкот Мухамед и се слави овој четврток.
Естроси додаде дека жртвите биле убиени на „страшен начин“.
„Методите несомнено се совпаѓаат со оние против храбриот професор Самуел Пети“, рече градоначалникот на Ница.
Нападот се случил кога Франција сè уште се опоравувала од ужасниот атентат врз професорот во средно училиште, Самуел Пети, кој исто така бил обезглавен од 18-годишен муслиман од чеченско потекло, откако професорот им ги покажал карикатурите на пророкот Мухамед на учениците.
Сè уште не е познато дали денешните напади биле поврзани со објавувањето на тие карикатури, кои муслиманите ги сметаат за сквернавење.
По атентатот на Пети, француските власти го потврдија правото да ги прикажуваат карикатурите прикажани на маршевите на солидарност со убиениот професор.
Ова ги налути муслиманските земји, а некои влади го обвинија Макрон дека има анти-исламистичка агенда.
Кремљ денеска го коментираше обезглавувањето во Франција. Од таму соопштуваат дека е неприфатливо да се убиваат луѓе, но и дека е погрешно да се навредуваат чувствата на верниците.
