Собранието на Косово со 67 гласа „за“, 30 „против“ и ниеден воздржан го изгласа синоќа лидерот на Движењето Самоопределување (ВВ), Албин Курти за нов премиер и го усвои неговиот предлог за состав на новата Влада на Косово.
Кабинетот на Курти го соинуваат 18 членови, од кои тројца вицепремиери. Осуммина од нив, како што објави Курти, се членови на неговата партија, ВВ, која извојува убедлива победа на вонредните парламентарни избори, одржани на 14 февруари, со освоени – заедно со листата „Осмели се“ на досегашната собраниска спикерка и вршителка на должноста претседател на Косово, Вјоса Османи – 50,27 отсто од гласовите и 58 места во 120-членото Собрание на Косово. Новиот премиер нагласи и дека една третина од членовите на неговата Влада се жени, а две од нив вицепремиерки.
