Земјите од Европската унија ги наполнија складиштата на гас до 90 отсто и со тоа ја исполнија зацртаната цел два и пол месеци пред предвиденото, соопшти Генералниот директорат на ЕУ за енергетика.
Според последните податоци на гасната инфраструктура на Европа, 90,12 отсто од капацитетот или 1.024 терават-часови гас се полни во европските магацини, што е еднакво на 93 милијарди кубни метри природен гас.
Со цел да се подготви за претстојната зима, ЕУ постави обврзувачка цел до 1 ноември да ги наполни складиштата за гас до 90 проценти. Складирањето на гас е од клучно значење за безбедноста на снабдувањето во Европа бидејќи може да покрие до една третина од побарувачката на гас во текот на зимските месеци.
Еврокомесарот за енергетика Кадри Симсон изјави дека денешната потврда дека целите за складирање на гас се исполнети пред предвиденото покажува дека ЕУ е подготвена за зима и дека тоа ќе помогне за дополнително стабилизирање на пазарите во наредните месеци.
„Енергетскиот пазар на ЕУ е во многу постабилна позиција отколку во овој период минатата година, најмногу поради мерките преземени на ниво на ЕУ. Но, видовме во претходните недели дека пазарот на гас е сè уште чувствителен. „Комисијата ќе продолжи да ја следи ситуацијата, така што нивото на складиран гас да остане доволно високо како што ќе влеземе следната зима“, рече Симсон.
Таа додаде дека состојбата може дополнително да се подобри со инвестирање во обновливи извори на енергија и енергетска ефикасност.
Овие податоци укажуваат дека ЕУ успеа да ја намали зависноста од рускиот гас, кој пред војната задоволуваше околу 40 отсто од потребите на Унијата.
Рускиот гас во голема мера е заменет со увоз од САД, Норвешка и Азербејџан, но некои земји од Централна Европа, особено Австрија, продолжуваат да се потпираат на увоз преку гасоводи низ Украина.
Поради намалувањето на извозот во европските земји, приходите на Русија од извозот на енергетски производи се намалија за 41 отсто на 43,4 милијарди долари во првите седум месеци од оваа година, а рубљата минатата недела падна на најниско ниво во изминатата година и половина.
