Војната во Газа ќе трае „повеќе од само неколку месеци“, изјави израелскиот министер за одбрана Јоав Галант пред високи американски претставници во Тел Авив.
„Тие изградија подземна и надземна инфраструктура и не е лесно да се уништи. Ќе биде потребно време – ќе потрае повеќе од неколку месеци, но ние ќе победиме“, рече Галант за време на разговорот со американскиот советник за национална безбедност Џејк Саливан.
Тој им се заблагодари на САД за континуираната помош за Израел и нивните напори да ги ослободи заложниците киднапирани од Хамас во нападот врз Израел на 7 октомври. По средбата, Саливан се сретна со израелскиот премиер Бенјамин Нетанјаху и други членови на воениот кабинет. САД разговараа со израелското раководство за можна транзиција кон воени операции со „помал интензитет“ во Газа, соопшти Белата куќа.
Директорот за комуникации на Советот за национална безбедност на САД, Џон Кирби, рече дека Саливан разговарал за „можната транзиција од она што би го нарекле операции со висок интензитет, како што гледаме дека го прават сега“, на операции со помал интензитет. „Но, не сакам да ставам временски печат на тоа“, додаде тој. Кирби не кажа како би можела да изгледа таа операција.
Американскиот претседател Џо Бајден рече дека сака Израел да се фокусира на тоа како да спаси цивилни животи во Газа.
„Сакам да бидат фокусирани на тоа како да спасат цивилни животи, да не ги запираат нападите против Хамас, туку да бидат повнимателни“, рече Бајден.
На прашањето за времетраењето на војната, Кирби рече дека САД не им диктираат на Израелците колку долго треба да трае војната. Израел продолжи да го гаѓа Појасот Газа во четвртокот и покрај интензивните меѓународни повици за заштита на цивилите и ширењето на смртоносните болести меѓу раселените жители.
Според Министерството за здравство во Газа, израелската армија во нападите убила најмалку 18.600 луѓе, а ранила 50.000. Истражувањето на јавното мислење во Израел покажа дека граѓаните не сакаат армијата да ја прекине офанзивата за да го уништи Хамас и покрај повикот на Генералното собрание на ОН за прекин на огнот, зголемениот список на воени жртви и зголемениот број на палестински жртви во Газа.
