Доналд Трамп ја нарече „вистински срам“ одлуката на социјалните мрежи привремено да ги затворат неговите профили, во соопштение откако надзорниот одбор на Фејсбук објави дека ја продолжува забраната за објавување пораки на Фејсбук и Инстаграм.
„Она што го направија Фејсбук, Твитер и Гугл е вистинска срамота“, напиша тој во објавата.
„На американскиот претседател му е одземена слободата на говор затоа што крајно левите лудаци се плашат од вистината, но вистината ќе излезе во секој случај, поголема и посилна од кога било“, додаде Трамп, осврнувајќи се на неоснованите обвинувања што ги изнесе претходно за американските претседателски избори во ноември 2020 година.
“Луѓето во оваа земја нема да го толерираат ова! Овие групи на социјални мрежи мораат да ја платат политичката цена и никогаш повеќе не смее да им се дозволи да го уништуваат и осакатуваат нашиот изборен процес”, додаде поранешниот американски претседател.
Во иста насока, републиканските пратеници во Конгресот реагираа со закани дека ќе ги нападнат големите технолошки компании доколку повторно освојат мнозинство на следните парламентарни избори во ноември 2022 година.
Ако Фејсбук „може да го забрани пристапот до претседателот Трамп, тогаш можам да му го сторам истото на кој било конзервативец“, објави на Твитер лидерот на републиканското малцинство во Претставничкиот дом, Кевин Мекарти. „Републиканското мнозинство во Домот ќе ја ограничи моќта на технолошките гиганти над нашите зборови“, вети тој.
Надзорниот одбор на Фејсбук ја потврди суспензијата на поранешниот американски претседател Доналд Трамп од таа социјална мрежа, но му даде на Фејсбук шест месеци да одреди „пропорционален одговор“ за во иднина.
