Обувки, облека, храна, метални производи, ИТ услуги и логистика е потенцијалот на нашите фирми кој можат да му го понудат на НАТО. Откако компаниите добија законска можност да може да учествуваат во јавните набавки на НАТО, сега државата треба да поработи како да ја подигне конкурентноста бидејќи до пазарот на НАТО се стигнува многу тешко, велат од стопанските комори
„За да се натпреварува македонското стопанство на тоа поле потребна е сериозна анализа, стратешки пристап и преземање на организирано дејствување во наддавање со производи и услуги за кои имаме конкурентна предност. Придобивките не можат целосно да се искористат без добро управување…“, велат од Сојузот на стопански комори.
За министерката за одбрана, Радмила Шекеринска, од самите компании ќе зависи колку ќе го искористат пазарот на НАТО, но и од поддршката која државата ќе ја дава. Допрва ќе се објават подзаконските акти за да може компаниите да знаат какви стоки и услуги ѝ требаат на НАТО Алијансата.
„Следната недела ќе донесеме и подзаконски акти коишто се неопходни за македонските компании буквално да знаат што и како е планот и веднаш потоа ќе започне со работа Центарот за поддршка за македонски компании за настап на НАТО пазарот коишто го формираме во Министерството за одбрана“, рече Шекеринска.
Преку овој центар, компаниите ќе добиваат помош во однос на потребните административни процедури. Инаку, донесените измени во Законот за јавни набавки веќе се објавени во Службениот весник. За јавните набавки НАТО има годишен буџет од околу 5 милијарди евра.
