Тетово никако да се спаси од проблемот со кучињата скитници. Граѓаните велат дека се агресивни, а голем дел од нив се носат од другите градови.На тендер општината избра здружение за третирање на животните, но одобрените средства за оваа намена се минимални. Ќе се згрижат педесетина кучиња, на улица ќе останат стотина други.
По паркови, сообраќајници, често агресивни. Наместо решение проблемот со кучињата скитници во Тетово се усложнува. Речиси две години овие животни не се третираат, нивната бројка се поголема, безбедноста на граѓаните намалена.
Досега во Тетово се заловени, стерилизирани и повторно вратени на улица околу 500 кучиња. Но, проценките се дека има уште толку.
Месецов на тендер Општина Тетово го избра здружението Амос Шелтер за згрижување на овие животни. Одобрени се 20 000 евра, пари за третирање на едвај педесетина скитници.
Градоначалникот Биљал Касами вели дека средствата се мали, но проблемот ќе се решавал чекор по чекор.
Од Центарот за полошки плански регион пак, велат дека се работи на регионално решавање на проблемот со кучињата скитници. Ќе се изгради стационар за бездомните животни, наменет за целиот полошки регион, а како можна локација е посочена Општина Врапчиште.
