Најавеното уривање на последниот објект каде треба да се пробие булеварот „Благоја Тоска“ во Тетово не се реализираше. Градежна механизација со асистенција од полицијата излезе на терен, но по негодување на сопственикот да го напушти објектот, Општина Тетово му даде уште една недела рок за исселување. Експропријацијата е завршена, местото катастарски му припаѓа на општината, и семејството мора да го напушти објектот, велат градските власти.
„Експропријацијата е комплетирана и парите се префрлени на наменска сметка на судот затоа што странката не сака да ги земе тие пари. Во судот тече процедура, но само за одредување на сума. Сите процедури во рамки на законот ние сме ги предвиделе и сите пречки ќе ги надмимене за да продолжат градежните работи за отворање на тој булевар. Постигнавме еден договор со кој даваме на семејството време уште една недела да се исели од таму. Општината има најдено стан и ќе плаќа трошоци за кирија да живеат таму, се додека не најдат објект за постојано живеалиште со парите што ќе ги земат од експропријацијата“, изјави Бесар Дурмиши, претседател на Советот на Општина Тетово.
За сопственикот Исљам Рушити судот одредил компензација од 76 илјади евра, додека тој бара 120 илјади евра како да им се дозволи од вкупната површина од 462 метри квадратни, 80 метри квадратни да им останат за да изградат помала куќа.
-Ќе видиме тогаш што ќе се прави, со проценката што ќе се прави, колку ќе ни дадат, колку ќе биде. Сега е одлучено да останеме тука денес, изјави Исљам Рушити.
Од општината информираа дека законски не се во можност да дадат дозвола за градба на дел од површината.
За да се продолжи булеварот градежни работи со рушење на објекти започнаа уште во јули 2021 година во време на претходното општинско раководство. За градежни работи општината доби средства од ткн. ТАВ програма,а за експропријација средства од Владата.