Инфлацијата расте, војната во Украина е во полн ек, Русија под санкции – вака изгледа моменталната ситуација во земјата на чело со Владимир Путин. Граѓаните на Русија, среде зголемената инфлација и зголемените трошоци за увоз, се борат да дојдат до основната храна – јајцата.
Во многу градови има недостиг, а таму каде што се достапни, тие се скапи. Затоа во Белгород, град каде цените се уште се прифатливи, се забележани редици за купување јајца.
Цената на јајцата е зголемена за 42,4 отсто од почетокот на годината, објави Ројтерс, повикувајќи се на Московската Федерална статистичка служба. Експертите велат дека скокот на трошоците е индиректен резултат на западните санкции наметнати врз Москва од почетокот на војната во Украина.
Видеата на социјалните мрежи од оваа недела покажуваат дека Русите чекаат во долги редици за да купат кутии со јајца од локалните тезги за да избегнат да платат високи цени во супермаркетите.
Во едно такво видео споделено на мрежата Икс, порано позната како Твитер, луѓето на ладно време чекаат во голема редица на мал пазар на отворено.
Друго видео споделено од корисникот Џек Рајан покажува луѓе во долга редица кои чекаат да купат кутии со јајца од задната страна на приколка за полу-камион. Цените во руските супермаркети понекогаш се повеќе од двојно повеќе од она за што се продаваат на помалите пазари.
Во јужниот град Белгород, луѓето чекаа на ред на мал пазар за да купат 10 јајца за 65 рубли (0,72 долари), во споредба со цената на супермаркетот од 10 јајца за 150 рубли (1,67 долари), се вели во извештајот.
Жителката на Москва, Јелисавета Шалаевска, изјави за агенцијата Франс прес дека е „згрозена“ од зголемените трошоци.
„Она што се случува со цените е ноќна мора, и не само за јајцата, туку за се“, рече таа.
Илја Зарубин, 21-годишен студент, за AFP изјави дека „порано купувал јајца за 70 рубли во продавница, но сега тие чинат околу 130-140“.
Марина Петрова, извршен директор на московската фирма „Петрова пет консалтинг“, изјави за ТВ Курент Тајм дека порастот на цените на јајцата е предизвикан од порастот на цените на храната за живина и ветеринарните производи, што е последица на влијанието на западните санкции врз увезената стока.
