Вкупно 1601 набљудувачи ќе ги набљудуваат утрешните претседателски избори во Северна Македонија, откако на денешната седница на Државната изборна комисија (ДИК) беа акредитирани нови набљудувачи, кажа претседателот на ДИК, Александар Даштевски, на седницата на комисијата на 23 април.
Од нив, 915 се домашни набљудувачи, 544 се меѓународни набљудувачи, има 84 преведувачи и 58 странски новинари.
Акредитираните набљудувачи и странски новинари и медиуми добиваат беџови од ДИК за да можат да ги следат изборите. Домашните новинари, фоторепортери и сниматели ќе можат да известуваат и да ги посетуваат избирачките места од изборите само со своите прес-легитимации.
Дозволено е да се снима и да се слика во избирачките места, но не е дозволено да се снима и да се слика зад параванот за да не се наруши тајноста на гласањето.
