Претседателот на Србија, Александар Вучиќ, денеска изјави дека добил информации дека „состанокот на делегати на високо ниво“ сега планира и демонстрации против Канцеларијата за Косово и Метохија на 19 септември.
Како што рече, додека бил во Командно-оперативниот центар на МВР на Србија за време на демонстрациите синоќа, добил информации дека „состанокот на делегати на високо ниво“ (пленум) одлучил, додека полицајците биле нападнати пред Филозофскиот факултет во Нови Сад, дека на 19 септември ќе бидат организирани демонстрации против Канцеларијата за КиМ.
„Не можат да најдат студенти, професори, никого. Значи, како лично Курти да им наредил што да прават, сега ќе демонстрираат против Канцеларијата за Косово и Метохија. Само кажете ми, дали мислите дека е можно ова да се случи случајно? Не мислите дека ова им се случило на Хрватите и Словенците? Или дека ова им се случило само на Приштина, Тирана и Загреб? Па, не се случило“, изјави Вучиќ за Пинк.
Според него, некој друг сака да ја држи геополитичката карта под контрола, онака како што се држела по Берлинскиот конгрес, пред Балканските војни, пред Првата светска војна, по Првата светска војна.
Синоќа во Нови Сад, рече тој, имало „брутално мешање“ во внатрешната политика на Србија бидејќи таму биле и пратеници на Зелените, „тие не дошле на партиски состанок на истомисленици, туку на состанок за кој знаеле дека е насилен“. Тој рече дека дел од обвинителите и судиите не сакаат да си ја работат работата, па затоа, додаде, ги ослободуваат уапсените блокатори затоа што „се на нивна страна или ги плаќаат од странство“.
По повод декларацијата за воена соработка потпишана од Хрватска и Словенија, тој изјави дека тие акти се јасно и препознатливо непријателски настроени кон српскиот народ и државата Србија. Во гостувањето на ТВ Пинк, Вучиќ рече дека „слични сојузи пред Првата светска војна биле склучувани на речиси идентичен начин“.
Тој рече дека „мора да бидеме свесни за нечии намери“, како и дека „мора добро да разбереме дека тие имаат силна позадина во НАТО“.
„Загрижен сум за молчењето на луѓето и од ЕУ и од НАТО“, рече српскиот претседател, додавајќи дека ќе се обиде да разговара со генералниот секретар на НАТО, Марк Руте.
Српскиот претседател додаде дека државата потрошила дополнителни 50 милиони евра за обезбедување „нелегални, криминални собири“ за осум месеци. „Денеска ќе го обезбедуваме и тој блокадерски прајд тоа повеќе не е прашање на човекови права, туку дел од блокадерскиот протест“, изјави Вучиќ за телевизијата Пинк.
