При извршен преглед на полуприколката, со помош на специјален уред – ендоскоп е откриен скриен бункер, во кој се пронајдени вкупно 5 050 штеки, од кои 800 се штеки со цигари, а 4 250 со електронски цигари
Лишен е од слобода српски државјанин што со товарно возило марка „ман“ со полуприколка „шмитц“ се обидел да пренесе 5 050 штеки цигари на граничниот премин „Стар Дојран“, информираат од Министерството за внатрешни работи (МВР).
Акцијата вчера попладне ја реализираа полициски службеници од Полициската станица за граничен надзор и граничен премин „Стар Дојран“ во координација со царински службеници и припадник на Фронтекс.
„Лишен е од слобода М. Г. (56) од Република Србија, кој управувал товарно возило марка ‘ман‘ со полуприколка ‘шмитц‘ со српски национални ознаки“,
велат од полицијата.
Граничната контрола утврдила дека е фалсификуван ВИН-бројот на полуприколката во сообраќајната дозвола.
„При извршен преглед на полуприколката, со помош на специјален уред – ендоскоп, пронајден е скриен бункер, во кој се пронајдени вкупно 5 050 штеки, од кои 800 се штеки со цигари, а 4 250 се штеки со електронски цигари“,
се вели во полицискиот извештај.
Ова се фотографии од вчерашната акција за спречен шверц на штеки цигари од страна на припадници на МВР:
Од МВР велат дека по целосното документирање на случајот, против возачот на камионот ќе бидат поднесени кривични пријави за фалсификување исправа и криумчарење акциска стока.
