Млада корисничка на „Тикток“ од Мали беше киднапирана во четвртокот, а потоа јавно погубена од џихадисти кои ја обвинија за соработка со војската на земјата, соопшти безбедносен извор и локален пратеник, пренесува Саут Чајна морнинг пост.
Маријам Сисе беше позната по своите видеа на „Тикток“ за нејзиниот град Тонка, во регионот Тимбукту во северниот дел на Мали. Младата жена имаше околу 90.000 следбеници на платформата.
Нејзината егзекуција предизвика длабоки емоции во земјата, која е управувана од воена хунта и се соочува со сериозна безбедносна и економска криза од 2012 година.
„Сестра ми беше заробена во четврток од џихадистите“ кои ја обвинија дека „ја информирала армијата на Мали за нивните движења“, изјави нејзиниот брат за АФП.
„Следниот ден, ја однесоа со мотор до Тонка, на Плоштадот на независноста, и ја застрелаа. Бев во толпата“, продолжи тој.
„Маријам Сисе беше убиена на јавен плоштад во Тонка во петокот од џихадисти кои ја обвинија дека ги снимала во име на армијата на Мали“, потврди безбедносен извор.
Локален парламентарец, исто така, ја потврди егзекуцијата. Џихадистичките групи поврзани со Ал Каеда и Исламската држава се активни во Мали повеќе од една деценија.
Во последните недели, џихадистите на Групата за поддршка на исламот и муслиманите (JNIM) воведоа блокада на увозот на гориво, парализирајќи ја економијата на земјата. JNIM сè повеќе го затегнува својот притисок врз ослабениот воен режим.
