Австриската полиција рано утринава објави ново соопштение за Данка Илиќ (2) и снимените две Романки, кои беа поврзани со исчезнувањето на девојчето, бидејќи со нив беше снимено дете кое физички наликуваше на малата Данка. Имено, австриската полиција исклучи каква било поврзаност на Романките од видеото и Данкa Илиќ.
Српски државјанин кој живее во Виена им пријавил на српските власти дека на трамвајската станица Шотенринг забележал мало дете во придружба на две возрасни жени.
– Забележувајќи ја сличноста меѓу девојчето и двегодишното исчезнато дете во Србија, тој направи видео од трите лица и го сподели со српските власти. Со оглед на тоа што роднините, по прегледувањето на сликите, изјавиле дека најверојатно станува збор за исчезнатото девојче, фотографиите биле објавени од страна на државната полициска управа на Виена на 3 април 2024 година, по налог на Јавното обвинителство на Виена. Сега е разјаснет идентитетот на лицата од сликите и воспоставен е контакт со нив. Врз основа на истрагата и придружните факти, јасно и без никакво сомневање може да се исклучи врската меѓу лицата прикажани на објавените фотографии и исчезнатото девојче од Бор. Виенската државна криминалистичка полиција ја продолжува истрагата за осомниченото киднапирање деца – се вели во соопштението на австриската полиција.
