Косовското собрание денеска ја изгласа новата влада на чело со премиерот Авдулах Хоти од Демократскиот сојуз на Косово, што е втората влада по изборите што се одржаа во октомври минатата година.
Владата беше изгласана со 61 гласови за, 24 против и еден воздржан, што беше минимум гласови за избор. На седницата не присуствуваа пратениците од партијата Самоопределување на доскорешниот премиер Албин Курти.
Еден од приоритетите на новата влада ќе биде дијалогот со Србија во соработка со ЕУ и САД, но „не допуштајќи промена на границите или размена на територии“, рече новоизбраниот премиер Хоти.
Собранието ѝ изгласа недоверба на владата на Курти на 25 март, 52 дена по формирањето. Барањето за недоверба го покрена владиниот партнер – Демократскиот сојуз на косово поради несогласувањата за мерките против коронавирусот и односите со САД.
Самоопределување, кои на изборите освоија најмногу гласови, ја сметаат владата за нелегитимна.
Извор РСЕ
