Еден од највлијателните ирански функционери, Али Лариџани, кој ја извршува функцијата секретар на Врховниот совет за национална безбедност, испрати остра порака до американскиот претседател Доналд Трамп, заканувајќи му се со „елиминација“.
– Иран не се плаши од вашите празни закани. Дури и оние поголеми од вас не би можеле да ја елиминираат иранската нација. Чувајте се за себе за да не бидете елиминирани – напиша Лариџани на социјалната мрежа X.
Неговата порака дојде како одговор на претходната изјава на самиот Трамп, кој го предупреди Техеран дека ќе се соочи со „оган и бес“ ако не го отвори Ормутскиот теснец. Американскиот претседател потоа рече дека САД би можеле да го нападнат Иран „20 пати посилно“ отколку порано.
Ормутскиот теснец е од големо значење за светската економија бидејќи е еден од клучните патишта за транспорт на нафта. Откако Иран го затвори преминот, цените на енергијата пораснаа низ целиот свет, вклучително и во САД.
